Ghazal, Gulzaar

Gazals Of Gulzaar | Love Gazals | Sad Gazals | Heart Touching Gazals | Urdu Gazals

Añkhoñ meñ jal rahā hai per bujhtā nahīñ dhuāñ
uThtā to hai ghaTā sā barastā nahīñ dhuāñ
Palkoñ ke Dhāñpne se bhī ruktā nahīñ dhuāñ
kitnī uñDelīñ āñkheñ pa bujhtā nahīñ dhuāñ
Añkhoñ se āñsuoñ ke marāsim purāne haiñ
mehmāñ ye ghar meñ aa.eñ to chubhtā nahīñ dhuāñ
Chūlhe nahīñ jalā.e ki bastī hī jal ga.ī
kuchh roz ho ga.e haiñ ab uThtā nahīñ dhuāñ
Kaalī lakīreñ khīñch rahā hai fazāoñ meñ
baurā gayā hai muñh se kyuuñ khultā nahīñ dhuāñ
Añkhoñ ke pochhne se lagā aag kā pata
yuuñ chehra pher lene se chhuptā nahīñ dhuāñ
Chiñgārī ik aTak sī ga.ī mere siine meñ
thoḌā sā aa ke phūñk do uḌtā nahīñ dhuāñ 

Gulzar Ghazals

Aisā ḳhāmosh to manzar na fanā kā hotā
merī tasvīr bhī girtī to chhanākā hotā
Yuuñ bhī ik baar to hotā ki samundar bahtā
koī ehsās to dariyā kī anā kā hotā
Saañs mausam kī bhī kuchh der ko chalne lagtī
koī jhoñkā tirī palkoñ kī havā kā hotā
Kāñch ke paar tire haath nazar aate haiñ
kaash ḳhushbū kī tarah rañg hinā kā hotā
Kyuuñ mirī shakl pahan letā hai chhupne ke liye
ek chehra koī apnā bhī ḳhudā kā hotā

Be-sabab muskurā rahā hai chāñd
koī sāzish chhupā rahā hai chāñd
Jaane kis kī galī se niklā hai
jheñpā jheñpā sā aa rahā hai chāñd
Kitnā ġhāza lagāyā hai muñh par
dhuul hī dhuul uḌā rahā hai chāñd
Kaisā baiThā hai chhup ke pattoñ meñ
bāġhbāñ ko satā rahā hai chāñd
Sīdhā-sāda ufuq se niklā thā
sar pe ab chaḌhtā jā rahā hai chāñd
Chhū ke dekhā to garm thā māthā
dhuup meñ kheltā rahā hai chāñd

Gulzar Ghazals

Biite rishte talāsh kartī hai
ḳhushbū ġhunche talāsh kartī hai
Jab guzartī hai us galī se sabā
ḳhat ke purze talāsh kartī hai
Apne maazī kī justujū meñ bahār
piile patte talāsh kartī hai
Ek ummīd baar baar aa kar
apne TukḌe talāsh kartī hai
BūḌhī pagDanDī shahr tak aa kar
apne beTe talāsh kartī hai

Dard halkā hai saañs bhārī hai
jiye jaane kī rasm jaarī hai
Aap ke ba.ad har ghaḌī ham ne
aap ke saath hī guzārī hai
Raat ko chāñdnī to oḌhā do
din kī chādar abhī utārī hai
Shāḳh par koī qahqaha to khile
kaisī chup sī chaman pe taarī hai
Kal kā har vāqi.a tumhārā thā
aaj kī dāstāñ hamārī hai

Gulzar Ghazals

Dikhā.ī dete haiñ dhund meñ jaise saa.e koī
magar bulāne se vaqt lauTe na aa.e koī
Mire mohalle kā āsmāñ suunā ho gayā hai
bulandiyoñ pe ab aa ke peche laḌā.e koī
Vo zard patte jo peḌ se TuuT kar gire the
kahāñ ga.e bahte pāniyoñ meñ bulā.e koī
Za.iif bargad ke haath meñ ra.asha aa gayā hai
jaTā.eñ āñkhoñ pe gir rahī haiñ uThā.e koī
Mazār pe khol kar girebāñ duā.eñ māñgeñ
jo aa.e ab ke to lauT kar phir na jaa.e koī

Din kuchh aise guzārtā hai koī
jaise ehsāñ utārtā hai koī
Dil meñ kuchh yuuñ sambhāltā huuñ ġham
jaise zevar sambhāltā hai koī
Aa.ina dekh kar tasallī huī
ham ko is ghar meñ jāntā hai koī
PeḌ par pak gayā hai phal shāyad
phir se patthar uchhāltā hai koī
Der se gūñjte haiñ sannāTe
jaise ham ko pukārtā hai koī

Gulzar Ghazals

Ek parvāz dikhā.ī dī hai
terī āvāz sunā.ī dī hai
Sirf ik safha palaT kar us ne
saarī bātoñ kī safā.ī dī hai
Phir vahīñ lauT ke jaanā hogā
yaar ne kaisī rihā.ī dī hai
Jis kī āñkhoñ meñ kaTī thiiñ sadiyāñ
us ne sadiyoñ kī judā.ī dī hai
Zindagī par bhī koī zor nahīñ
dil ne har chiiz parā.ī dī hai
Aag meñ kyā kyā jalā hai shab bhar
kitnī ḳhush-rañg dikhā.ī dī hai

Click Here for More Gulzar Ghazals

Leave a Comment

Your email address will not be published. Required fields are marked *

Visit Us On FacebookVisit Us On Twitter